Andrew Poolman - Die ruwe jong rugbytalent van Namibië word vandag ietwat aan die diep kant ingegooi wanneer die Afrika-toernooi in dié ouderdomsgroep in die Hage Geingob-stadion begin.
Min tyd – drie oefendae om presies te wees – was vir afrigter Roger Thompson beskikbaar voor vanmiddag se wedstryd teen Tunisië wat om halfses afskop.
In die voorwedstryd om 15:00 takel die ander twee spanne mekaar – Zimbabwe en Kenia.
Vandag se twee verloorspanne takel mekaar Saterdag om 14:00 in die uitspeelwedstryd vir die derde plek, voor die wenners in die finaal om 16:00 ontmoet.
Terwyl die afgelope Momentum o.19 Superliga die trots van die land se rugbyskole weer behoorlik opgesweep het, is dit skielik weer tyd om dié verskille eenkant te skuif en saam die Namibiese trui oor die kop te trek.
Hoewel die nuwe kampioenskool Samsung Windhoek Hoërskool net ’n enkele verteenwoordiger in die span het, is dit ook bekend dat akademiese verpligtinge sommige spelers onbeskikbaar gemaak het.
Soos gewoonlik sal die wenspan in die Afrika-toernooi deurdring om volgende jaar by die Wêreldrugby Junior Trofee-toernooi in aksie te wees.
Wedstryde soos hierdie lewer altyd blink kanse wat nuwe spelers kan aangryp om hulself aan te kondig.
Die Namibiese span is:
1 André Rademeyer (Whk Affies)
2 Obert Nortjé (FNB Universiteit van Namibië, WHS)
3 Nelius Theron (Tsumeb Gimnasium)
4 Adriaan Ludick (Paarl Gimnasium, Elnatan)
5 Le Beau du Preez (Whk Gimnasium)
6 Tjingairi Katjivi (FNB Western Suburbs, Jan Möhr)
7 Darius von Solms (Whk Gimnasium)
8 Wynand Breytenbach (Walvisbaai)
9 Morenzel Strauss (Trustco United, Whk Gimnasium)
10 Cliven Loubser (WP Rugby-akademie, Whk Gimnasium)
11 Nico Maartens (Elnatan)
12 Tristan Mouton (WP Rugby-akademie, WHS)
13 Allister Miller (Walvisbaai)
14 Rudi Pretorius (Whk Gimnasium)
15 Chad Plato (Walvisbaai)
Reserwes
16 Christo Pienaar (Whk Gimnasium)
17 Sam Kuvare (Whk Gimnasium)
18 Dillon Skoppelitus (Walvisbaai)
19 Rainer Augustyn (WHS)
20 Stefan Hattingh (Whk Affies)
21 Hanreco van Zyl (Hoërskool Stellenbosch, Boland Cravenweek)
22 Chrischen Olivier (Whk Gimnasium)
23 Snyman van der Walt (Whk Affies)
Die res van die groeplede wat nie vandag betrokke sal wees nie, is die losvoorspeler Riaan de Klerk (Walvisbaai) en vleuel Collins Omalu.
Op die kortlys in geval van beserings is Elnatan se stut Dalla Joubert en slot Jan-Hendrik Augustyn, asook Windhoek Affies se skrumskakel Jay-C Olivier.
Toegang beloop N$30 vir volwassenes en N$10 vir kinders.