Sewes trek saam vir Nairobi

Des Erasmus - Namibië se aanloop tot die Afrika-bekertoernooi vir sewesrugby begin vanmiddag op die United-veld in Windhoek.
Dit sal die vorm van ’n oefenkamp aanneem. Van spelers wat landwyd meen hulle het aansprake op insluiting in die nasionale span word verwag om hulle om 18:30 by die veld aan te meld.
Die afrigter van die Namibiese sewesspan, Jurie Booysen van Swakopmund, sê die oefenkamp sal as siftingsproses van die beskikbare talent dien, maar sal uit die aard van die saak ook ’n slypproses vir deelnemers aan die kitsrugby wees.
Die oefenkamp sal tot Donderdag voortduur. Ná die laaste sessie van Donderdagmiddag en -aand sal spanne aangewys word vir proefwedstryde wat Vrydag om 19:00 in die Hage Geingobstadion gehou gaan word.
Die proefwedstryde sal Saterdag vanaf 08:00 voortgesit word.
’n Volgende stap sal die aankondiging van die Namibiese span wees wat uit ’n groep van 14 spelers sal bestaan. Aan die 14 uitverkose spelers sal dan met ’n oefenprogram volgehou word totdat die span vir die toernooi van 23 tot 25 September in Nairobi gaan vertrek.
Die spanbestuurder, Robbie Dickson van Windhoek, was gister op Swakopmund waar hy en Booysen oor die keuring en voorbereiding van die Namibiese span besin het.
Booysen het op Swakopmund aan Republikein gesê hy en Dickson besef die omvang van die Afrika-bekerkompetisie in Nairobi. Kenia as gasheerland het reeds internasionale aansien vir die land se span van sewes verwerf.
In hierdie stadium is dit nog nie bekend watter lande reeds die uitnodiging na die toernooi in Nairobi aanvaar het nie.