Pirates oorleef Wanderers-aanslag

Andrew Poolman - ’n Paar verspeelde kanse om te wen en ’n nederlaag met net twee punte in Johannesburg sal FNB Wanderers baie moed gee vir sy volgende wedstryd in die Gold Cup klubkampioenskap.
Afrigter JP Nel se manne het met 26-28 teen Pirates, die Goue Leeus Rugby-unie se verteenwoordiger in die landwye kompetisie vir oop klubs, verloor.
Die Windhoekers keer met twee ligapunte huis toe – een vir die naelskraapse verloorslag met minder as sewe punte, asook vir die vier drieë wat hulle by die Pirates-klub se veld gedruk het.
“Ons span voel baie positief oor die ondervinding. Ons het seker nog drie kanse verbrou toe ons nog drieë kon gaan druk het,” sê spanbestuurder Dirk Human.
“Ons het nou ’n afnaweek, maar sal beslis Dinsdag wanneer ons na die oefenveld terugkeer, aandag aan ons vaste fasette gee. Die span van Johannesburg het ons veral in die skrums nogal onder druk geplaas.”
Volgens Human was die flank DG Wiese die Wit Hingste se speler van die wedstryd met sy hoë werktempo en briljante verdediging.
“Stef Botha, Enem Kritzinger en ons senterpaar Francois Wiese en Heinrich Smit het ook baie goed gevaar, asook Riaan van Zyl wat impak gemaak het toe hy opgestuur is om by Léan Stoop oor te neem,” sê Human.
’n Paar strafskoppe te veel het die besoekers met tye onder druk geplaas, hoewel beide spanne uiteindelik twee spelers moes inboet wat hul tien minute in die koelkas moes uitdien. Aan Wanderers se kant was dit agtsteman Stef Botha (32ste minuut, nie tien meter terug ná ’n strafskop) en vleuel Deselvano Beukes (66 minuut, onkantspel by losskrum op eie doellyn).
Ná Pirates se eerste twee strafdoele het losskakel Mahco Prinsloo terug­geslaan met ’n drie wat hy verdoel het. Die Johannesburgers het die volgende twee drieë gedruk, insluitend ’n strafdrie ná ’n skrum­oortreding.
Skrumskakel Enem Kritzinger en vleuel Jamie Joseph het egter die volgende drieë gedruk waarmee Wanderers teruggeveg het.
In die laaste minuut van speeltyd het stut Shaun du Preez die besoekers se vierde drie gaan druk, met Prinsloo se enigste verbroude doelskop van die dag wat so byna ’n gelykopuitslag verseker het.
• Wanderers speel op 24 September tuis teen Northam Platinum Rhinos van die Limpopo-provinsie.