Die Namibiese sewesrugbyspan het gister na Nairobi vertrek waar Kenia komende naweek die Afrika-toernooi vir 2016 aanbied. Dit staan ook as die Safari Sewes bekend.
Sedert verlede week se nuusberigte het die toernooi aangegroei om nie meer agt spanne nie, maar 12 te bevat.
’n Groot geelwortel wat die naweek op die spel staan, is dat die kampioenspan na die Wêreldrugby Sewesreeks se toernooie later vanjaar in Dubai en Kaapstad genooi sal word. Dit is afgesien van spanne wat reeds vir die Wêreldreeks gekwalifiseer het.
Aan die ander kant sal die twee swakste presteerders (elfde en 12de) gerelegeer word.
Die nuwe groepering is soos volg (met elke span se keuringsposisie tussen hakies):
Groep A: Kenia (1), Senegal (12), Nigerië (8).
Groep B: Zimbabwe (2), Mauritius (11), Uganda (7).
Groep C: Marokko (3), Zambië (10), Madagaskar (6).
Groep D: Tunisië (4), Botswana (9), Namibië (5).
Vir die Namibiërs sal hul toernooi dus Vrydag met wedstryde teen Tunisië en Botswana begin.
Die vier groepwenners sal die volgende dag na die bekerafdeling se semifinaal aanbeweeg.
Tuna Amutenya, Nandivatu Karuuombe en Mbimbo Mbai is van die min spelers wat die land tevore in internasionale sewesrugby verteenwoordig het.
Dié tekort aan ondervinding kan dus heelwat druk plaas op die span se ambisie om ’n goeie eindposisie te beklink – tesame met die feit dat die groep beswaarlik twee weke ter voorbereiding gehad het sedert die proewe op 11 September.
Sover bekend het die nuwe afrigter Jurie Booysen en spanbestuurder Robbie Dickson nog geen kaptein vir die toer aangewys nie.
By die oorhandiging van die Namibiërs se nasionale kleure en uitrusting eergisteraand is bekend gemaak dat Scania hul speeluitrusting geborg het, terwyl GWM ’n stel rugsakke geborg het.
Plek in Wêreldreeks wink