Andrew Poolman
Twee Namibiërs maak môreaand in Tunis hul toetsdebuut wanneer Pieter-Jan van Lill om 19:00 sy rugbyspan teen Tunisië op die veld lei.
Die flank Leneve Damens en stut Johannes (Aranos) Coetzee is in die beginspan vir hierdie Afrika-bekerwedstryd ingesluit.
Van Lill was byna presies twee jaar gelede ook die kaptein toe die Welwitschias hul grootste telling nóg teen Tunisië opgestapel het deur met 45-13 te wen. Daardie dag in Dakar, Senegal, was die rustydvoorsprong nog op ’n ietwat senuweeagtige 13-6, voordat die Namibiërs se groter fiksheid en slaankrag die knoop deurgehaak het.
Van Lill, David Philander, Heinrich Smit, Theuns Kotzé, Tinus du Plessis, Jaco Engels, Rathony Bekker en Eneill Buitendag is die oorblywende lede van die span wat twee jaar gelede die laaste keer met Tunisië kragte gemeet het.
Ses oorwinnings en twee nederlae, is hoe die Namibiese vertoningslys teen die Noord-Afrikane in toetsrugby lees. Nege jaar het egter verloop sedert Tunisië laas aan die wenkant was en hulle is sekerlik nie veronderstel om môreaand ’n verrassing te lewer teen afrigter Danie Vermeulen se span, wat in September weer die vasteland se kwalifiseerder vir die Wêreldbekertoernooi in Engeland sal wees nie.
Een van die min faktore in Tunisië se guns kan moontlik vlugflouheid van die langerige reis wees, nadat die Namibiërs se aansluitingsvlugte hulle ook na Johannesburg en Istanboel geneem het.
Van Lill is ook môre verreweg die senior vennoot in ’n onbeproefde lostrio wat ook uit die nuweling Damens en Roderique Victor (twee toetse as plaasvervanger) bestaan. Beide dié spelers het egter tydens hul blootstelling in die Vodacombeker begin wys waartoe hulle in staat is en sal die span nie in die steek laat nie, met Tinus du Plessis en Thomasau Forbes wat op die reserwebank gereed sit om die intensiteit vir die volle 80 minute vol te hou.
In die afgelope weke het die stut Jaco Engels ook sewe kilogram afgeskud en is ooglopend gemotiveerd om weer van sy beste rugby te speel.
Die senterkombinasie van Danie van Wyk en JC Greyling is ook ’n interessante proefneming met beide wat waarskynlik meer tuis in die 13-trui lyk. Van Wyk maak sy terugkeer tot toetsrugby ná ’n afwesigheid sedert die 2011 Wêreldbeker en ’n stewige vertoning sal nodig wees om die talentvolle speler se aandele hoog te hou.
Van talent gepraat: Johann Tromp is vir sy eerste verskyning as heelagter op toetsvlak gekies nadat al sy toetse tot dusver as senter of vleuel gespeel is. Sy natuurlike aanvoeling vir die spel behoort hom nietemin doeltreffend te maak met die vlugvoetige David Philander en die sterke Conrad Marais wat saam met hom die agterste driehoek vorm.
Die span teen Tunisië:
1 Jaco Engels
2 Rathony Becker
3 Johannes (Aranos) Coetzee
4 Tjiuee Uanivi
5 Nico Esterhuyse
6 Leneve Damens
7 Roderique Victor
8 PJ van Lill (kapt)
9 Eneill Buitendag
10 Theuns Kotzé (o.kapt)
11 Conrad Marais
12 Danie van Wyk
13 JC Greyling
14 David Philander
15 Johann Tromp
Reserwes:
16 DG Wiese
17 Casper Viviers
18 Thomasau Forbes
19 Tinus du Plessis
20 Eugene Jantjies
21 Shaun Kaizemi
22 Heinrich Smit
NAMIBIë SE REKORD TEEN TUNISIë
(Namibiese kapteins en afrigters aangedui):
2013, 15 Junie in Dakar wen 45-13 PJ van Lill Danie Vermeulen
2009, 28 November in Windhoek wen 22-10 Kees Lensing John Williams
2009, 14 November in Tunis wen 18-13 Kees Lensing John Williams
2006, 7 Oktober in Windhoek wen 23-15 Corné Powell Johan Venter
2006, 1 Julie in Tunis verloor 7-24 Corné Powell Johan Venter
2002, 12 Oktober in Tunis verloor 17-24 Corné Powell Dave Waterson
2002, 28 September in Windhoek wen 26-19 Corné Powell Dave Waterson
1998, 18 Maart in Tunis verloor 17-20 Quinn Hough Deon Kotze